ЖАҢЫЛЫКТАР

КЫРГЫЗТЕСТ: ЖОЖДОР МЕНЕН КЫЗМАТТАШУУ УЛАНУУДА

КЫРГЫЗТЕСТ: ЖОЖДОР МЕНЕН КЫЗМАТТАШУУ УЛАНУУДА

          Республикабыздын жогорку окуу жайларынын окутуучуларынын арасында тилди билүү деңгээлин аныктоо тестин жүргүзүү боюнча алгылыктуу иштер улантылууда. Атап айтсак, буга чейин Ош жана Жалал-Абад облустары боюнча Ош мамлекеттик университетинин, М. Адышев атындагы Ош технологиялык университетинин жана Б. Осмонов атындагы Жалал-Абад мамлекеттик университетинин, ошондой эле Бишкек шаары жана Чүй облусу боюнча Кыргызстан Эл аралык  университетинин профессордук-окутуучулук курамы мамлекеттик тилди билүү деңгээлин аныктоо тестине катышкан эле.

          Бүгүн, 2024-жылдын 23-октябрында «Кыргыз Республикасынын мамлекеттик тили жөнүндө» 2023-жылдын 17-июлундагы №140 конституциялык Мыйзамын ишке ашыруу максатында, «Кыргызтест» мамлекеттик мекемеси Эл аралык жогорку медициналык мектебинин (ЭАЖММ) администрациясы жана профессордук-окутуучулук курамы үчүн аталган окуу жайдын Клиникалык симуляциялык борборунда мамлекеттик тилди билүү деңгээлин аныктоо боюнча тест өткөрдү.

          Тесттен ийгиликтүү өткөн ЭАЖММ кызматкерлерине тест жыйынтыгы боюнча тиешелүү деңгээлдеги сертификаттар берилет.